Қарағанды облысының туристік әлеуеті «САЯХАТ 2026» халықаралық форумында таныстырылды

Астанада өткен «САЯХАТ 2026 | Kazakhstan Travel Forum» халықаралық туристік форумы аясында Қарағанды облысының туристік әлеуеті кеңінен таныстырылды.

Іс-шара барысында өңірдің табиғи, тарихи-мәдени және емдік-сауықтыру туризмі бағытындағы мүмкіндіктері ұсынылды. Көрме алаңына келген қонақтар Қарағанды облысының туристік нысандары, демалыс орындары мен саяхат бағыттары туралы ақпарат алды.

Облыстың туристік бренді ретінде Балқаш көлі, Қарқаралы таулары, Бектау-Ата таулары, «Бұйратау» ұлттық табиғи паркі және басқа да көрікті жерлер таныстырылды. Бұл бағыттар табиғи туризммен қатар, экотуризм, жағажай демалысы, тау туризмі және мәдени-танымдық саяхат үшін қолайлы мүмкіндіктер ұсынады.

Форумға Қарағанды облысының атынан «Балқаш» емдік-сауықтыру кешені де қатысты. Кешен өңірдің жыл бойы демалуға және сауықтыруға арналған туристік мүмкіндіктерін таныстырып, емдік-сауықтыру және wellness-туризм бағыттарын дамытудағы әлеуетін көрсетті.

Іс-шара барысында келушілерге өңірдегі туристік нысандар туралы ақпараттық материалдар ұсынылып, Қарағанды облысында демалыс ұйымдастыру мүмкіндіктері таныстырылды. Сондай-ақ туристік өнімдерді ілгерілету, өңірге келушілер санын арттыру және жаңа туристік бағыттарды дамыту мәселелеріне назар аударылды.

«САЯХАТ 2026 | Kazakhstan Travel Forum» форумы Қазақстанның туристік өңірлерін бір алаңда таныстыруға, олардың туристік өнімдерін кең аудиторияға көрсетуге және сала өкілдері арасында кәсіби байланыстарды дамытуға мүмкіндік берді.

Қарағанды облысы табиғи ландшафтары, тарихи-мәдени мұрасы және сауықтыру туризмімен Қазақстанның туристік картасындағы маңызды өңірлердің бірі ретінде өз мүмкіндіктерін таныстыруды жалғастыруда.