Туризм мен спортты дамыту: Вице-министр Қарағанды облысының тұрғындарымен кездесті

6 қазанда Қарағанды қаласында (Шахтерлер даңғылы, 64, Қарағанды облысы Қазақстан халқы Ассамблеясының Достық үйінде) ҚР Туризм және спорт вице-министрі Мирас Төлебаевтың өңір тұрғындарымен кездесуі өтті. Іс-шараға туризм және спорт саласының мамандары, спортшылар, жаттықтырушылар, жергілікті атқарушы органдар мен туристік қауымдастық өкілдері қатысты.

Кездесу барысында бұқаралық спортты дамыту, спорт инфрақұрылымын жетілдіру, балалар мен жасөспірімдерді спортқа кеңінен тарту, ұлттық спорт түрлерін қолдау және өңірдің туристік әлеуетін тиімді пайдалану мәселелері сөз болды.

«Қарағанды облысы – табиғи және тарихи-мәдени әлеуеті жоғары, спортта өзіндік мектебі қалыптасқан өңір. Біздің міндетіміз – осы мүмкіндіктерді тиімді пайдаланып, тұрғындарға спортпен айналысуға және сапалы демалысқа қолайлы жағдай жасау, сондай-ақ туризм саласына жаңа инвестиция тарту», – деді Мирас Төлебаев.

Негізгі көрсеткіштер мен жетістіктер:

• Инвестициялар: 8 айдың қорытындысы бойынша туризм саласына 15,5 млрд теңге инвестиция тартылып, көрсеткіш 10%-ға өсті.

• Туристік ағын: Жылдың бірінші жартыжылдығында облыстың орналастыру орындарында 181 мың ішкі туристке қызмет көрсетілді. Өңірге 9,6 мың шетелдік турист келді (+17%).

• Жаңа жобалар: Биыл жалпы құны 12,7 млрд теңге болатын 14 жаңа туристік жоба іске асырылды (оның ішінде Балқашта 6 нысан және Қарқаралы ауданында 4 жоба). Жыл соңына дейін тағы 9 жобаны жүзеге асыру жоспарлануда.

• Негізгі бағыттар: Тоғыз айда Балқаш қаласына шамамен 200 мың турист келді (+18%), ал Қарқаралы ұлттық паркіне 43 мың адам барды (+23%). Бұғылы рекреациялық аймағында құны 4,4 млрд теңге болатын инженерлік инфрақұрылым салынуда.

• Оқиғалық туризм: Балқашта өткен BalkhashTourFest фестивалі 75 мың қонақты жинаса, Қарқаралыдағы BaiQymyz-2026 шарасына 20 мыңға жуық адам қатысты.