Белсенді демалыс, мотошеру және веложарыс: Қарағанды облысында Дүниежүзілік туризм күні қалай атап өтілді
Қарағанды облысында Дүниежүзілік туризм күніне арналған мерекелік іс-шаралар өтті. Өңір тұрғындары мен қонақтары үшін Орталық саябақта интерактивті алаңдар, мотошеру және Қарқаралыда веложарыс ұйымдастырылды.
Қарағанды облысында Дүниежүзілік туризм күні кең көлемде атап өтілді. Өңір тұрғындары мен қонақтары үшін спорттық белсенділіктер мен туристік алаңдар ұйымдастырылды.
Қарағандыдағы Орталық саябақта «Белсенді туризм аумағы» атты алаң жұмыс істеді. Келушілер заманауи туристік снаряжениемен, велосипедтермен, SUP-жабдықтармен және қайықтармен танысып, арқанды жолақта өз күштерін сынап көрді.
Мерекенің жарқын оқиғаларының бірі — мотомаусымның жабылуына арналған мотошеру болды. Колонна Республика даңғылындағы Теннис орталығынан бастау алып, Төлепов көшесі арқылы Виктор Цой ескерткішінің жанында мәреге жетті.
Спорттық бағдарлама Қарқаралы қаласын да қамтыды. Мұнда «MOUNTAIN BIKE QARQARALY» ашық облыстық веложарысы өтіп, жасөспірімдер мен ересектер 21 шақырымдық қашықтықты сәтті бағындырды.
