DOMBYRA UNITY: Ұлттық домбыра күніне орай әлемнің әртүрлі елдерінің қатысушылары қазақтың күйлерін орындады

Ұлттық домбыра күніне орай Қарағанды облысының Мәдениет, архивтер және құжаттама басқармасы ұйымдастырған DOMBYRA UNITY халықаралық онлайн-челленджі әлемнің әртүрлі елдерінен домбырашылар мен қазақтың дәстүрлі музыкасын сүйер қауымды бір арнаға тоғыстырды. Жоба алғашында Қарағанды облысының өнерпаздары мен шетелдік домбыра орындаушыларының қатысуымен өтетін халықаралық шығармашылық бастама ретінде жоспарланған болатын. Алайда челленджге деген қызығушылық ұйымдастырушылар күткеннен де жоғары болды. Жобаға Нидерланд, АҚШ, Бельгия, Швеция, Өзбекстан және басқа да елдердің қатысушылары қосылып, оның географиясы әлемнің көптеген құрлықтарын қамтыды. Челлендж аясында қатысушылар қазақтың белгілі халық күйлерін орындап, өз бейнежазбаларын әлеуметтік желілерде жариялады. Бұл бастама Қазақстанның ұлттық музыкалық мұрасын кеңінен насихаттауға және түрлі елдер арасындағы мәдени байланысты нығайтуға ықпал етті. Ұйымдастырушылардың айтуынша, халықаралық деңгейдегі қызығушылықтың ауқымы күткеннен әлдеқайда жоғары болды. Әлемнің түкпір-түкпірінен келіп түскен бейнероликтер қазақтың дәстүрлі музыкасына деген зор қызығушылықтың бар екенін көрсетті. DOMBYRA UNITY халықаралық онлайн-челленджі өнердің шекара мен қашықтыққа қарамай адамдарды біріктіре алатынын тағы бір мәрте дәлелдеп, Қазақстанның мәдени мұрасын халықаралық деңгейде танытуға өз үлесін қосты.