Қарқаралыдағы Құнанбай қажы мешіті – өңірдің тарихи мұрасының жарқын үлгісі

Қарқаралыға сапар аясында өңірдің ең маңызды тарихи-мәдени нысандарының бірі – 1851 жылы Құнанбай қажының бастамасымен салынған Құнанбай қажы мешіті таныстырылды. Бүгінде бұл мешіт тек діни ескерткіш қана емес, қазақ халқының рухани және мәдени мұрасының маңызды бөлігі саналады. Экскурсия барысында қатысушылар мешіттің салыну тарихымен және оның сәулеттік ерекшеліктерімен танысты. Деректерге сәйкес, бастапқыда патшалық әкімшілік мешіт құрылысына батпақты жер бөлген. Алайда Құнанбай қажының бастамасымен құрылыс орны өзгертіліп, мешіт Қарқаралының ең қолайлы әрі көрікті жеріне бой көтерген. Сондай-ақ келушілерге кеңестік кезеңде мешіт мұнарасындағы айшықты алып тастау әрекеті туралы тарихи оқиға баяндалды. Ел аузында сақталған дерек бойынша, айшықты түсіруге әрекет жасаған адамның жарақат алуынан кейін халық бұл оқиғаны киелі орынмен байланыстырған. Кейін айшық атып түсіріліп, жергілікті тұрғындардың бірі оны ондаған жыл бойы сақтап келген. Тарихи әділдік орнап, мешіт қайта қалпына келтірілген кезде сол айшық өз орнына қайта орнатылды. Экскурсия барысында Құнанбай қажының мешітпен қатар оның жанынан медресе ашқаны да айтылды. Халық арасында «Тас мектеп» аталған бұл оқу орнында діни біліммен қатар есеп, жазу-сызу және сауда ісі оқытылған. Сабақ беруге Омбы мен Семей қалаларынан ұстаздар шақырылып, медресе өңірдегі ағартушылықтың маңызды орталықтарының біріне айналған. Қонақтар тарихи нысанмен танысып қана қоймай, Қарқаралы өңірінің бай табиғи және мәдени мұрасы туралы да мол мағлұмат алды. Құнанбай қажы мешіті бүгінгі күні Қарқаралының ең көп баратын туристік орындарының бірі ретінде өңірдің тарихи-танымдық туризмін дамытуға зор үлес қосып келеді.